თუ იკითხავთ, ბათუმში წასასვლელად საუკეთესო დრო რომელია, აუცილებლად გიპასუხებთ, რომ ბათუმში უნდა წახვიდეთ მაშინ, როცა ქალაქში მუსიკის სურნელი ერევა ზღვის სურნელს და თავბრუდამხვევ გარემოს ქმნის. მელომანები განსაკუთრებულედ ველოდებით ხოლმე ივლისის ბოლო კვირას, რადგან უკვე ტრადიციად ქცეული შავი ზღვის ჯაზფესტივალი იმართება.
წელს შავი ზღვის ფესტივალი მეჩვიდმეტედ გაიმართა ( მე ვიტყოდი უშუალოდ ზევსის პატრონაჟით, რადგან დღის საათებში ბათუმის წვიმის სტუმრობა, საღამოს საფესტივალო ამინდით იცვლებოდა. კი, ზევსიც ჩვენიანია ) ისთენ ფრომოუშენმა, როგორც ყოველთვის , დაუვიწყარი 3 დღე გვაჩუქა მელომანებს.
ფესტივალი გახსნა 11 გრემის მფლობელმა მულტიინსტრუმენტალისტმა და პროდიუსერმა ფილიპ ლასიტერმა. იგი სცენაზე 14 კაციან ბენდთან ერთან წარსდგა. ერთმანეთს ენაცვლებოდა კლავიშის, ბასის, ჩასაბერი და დასარტყამი ინსტრუმენტების სოლოები. პირველი დღის კულმინაციად შეიძლება ჩაითვალოს ფილიპ ლასიტერის იმპროვიზაციით შესრულებული “Musicology” ლეგენდარული მუსიკოსის , პრინცის შემოქმედებიდან, რომელთანაც ლასიტერი თანამშრომლობდა. რამდენიც არ უნდა გიამბოთ ფესტივალის პირველ დღეზე, მაინც ვერ გადმოგცემთ ფანქისა და სოულის იმ ელემენტებს, რაც მელომანებმა სახლში კარგად შეფუთული წავიღეთ, რომ არცერთი ბგერა გზაში არ დაგვფანტვოდა და დავიწყეთ მზადება ფესტივალის მეორე დღისთვის.
მეორე დღეს დრამის ჯადოქარს, ყველაზე სწრაფი ხელების პატრონს, ჯოჯო მაიერს შევხვდით, თავის ჯადოსნურ ბენდთან The Nerve- სთან ერთად . მოსმენილმა მოლოდინს გადააჭარბა, „რიტმების ალქიმიკოსმა“ახალი პროგრამა წარგვიდგინა და არაამქვეყნიური ბგერების პლანეტაზე გვამოგზაურა. ჯოჯომ ინტერვიუშიც აღნიშნა, რომ როგორც სხვა იმპროვიზატორი მუსიკოსები, ისიც ნოვატორია და მუდმივად ეძებს სიახლეებს, ეს მის შემოქმედებაშიც იგრძნობა, სადაც არ არსებობს საზღვრები. ჩემთვის ფესტივალის მეორე დღეს კულმინაცია არ ჰქონია , რადგან მთლიანად იყო ელექტრონული მუსიკისა და ჯაზის სინთეზის კოსმოსური მუსიკალური გამოცდილება.
ფესტივალის მესამე დღეს , ჩემს ბავშვობასთან შეხვედრას, გულის ფანცქალით ველოდებოდი. არც მეტი , არც ნაკლები , ლეგენდარული ჯექსონების ცოცხლად მოსმენის შანსი მოგვეცა. ჩემსავით ძალიან ბევრი ადამიანი ელოდებოდა, რადგან ფესტივალის სტუმართა რაოდენობამ ყოველგვარ მოლოდინს გადააჭარბა. უნდა აღინიშნოს, რომ მშობლები, შვილები და შვილიშვილები ერთნაირი მონდომებით მღეროდნენ ჯექსონების ჰიტებს. ტიტომ, ჯეკმა და მარლონმა ჯექსონურ სამყაროში გადაგვიყვანეს. კონცერტი გაიხსნა დიდ ეკრანზე გაშვებული ვიდეორგოლით, რომელიც ჯექსონების ისტორიას მოგვითხრობდა ბავშვობიდან დღემდე. ახლა ვაპირებდი ჰიტების ჩამოთვლას, რაც კონცერტზე შესრულდა და გადავიფიქრე, რადგან მთელ კონცერტს თხრობით ხომ არ მოგიყვებით?
იმ ადამიანებისთვის, ვინც ვერ მოახერხა შავი ზღვის მე-17 ჯაზ ფესტივალზე დასწრება, ფესტივალის სამივე დღეს გადიოდა კონცერტების ლაივები , რომლების დიდი ნაწილი რილსებად შეგინახეთ და შეგიძლიათ ნახოთ ჩვენს ინსტაგრამზე : retromania.ge.
ძალიან მიხარია, რომ რეტრომანია ჩამოყალიბდა პლატფორმად, რომელმაც ხარისხიანი მუსიკა გახადა ყველასთვის ხელმისაწვდომი.
მინდა დიდი მადლობა გადავუხადო ფესტივალის ორგანიზატორებს 3 საოცარი და ჟანრობრივად განსხვავებული მუსიკალური დღესასწაულისთვის.
შევხვდებით ბათუმში.
