2024 წლის 8 მარტს Bilboard Georgia Stage-ის ორგანიზებით კლუბ Republic -ის სცენა „ბასისტების დედოფალმა“ ნიკ უესტმა დაიპყრო, რომელიც საქართველოს ტურნეს ფარგლებში ესტუმრა.
ნიკ უესტის უნიკალური სტილი და ინდივიდუალური შესრულების მანერა თავისუფლების განცდას აღრმავებს ნებისმიერ ადამიანში და გაფიქრებინებთ, რომ შეუძლებელი არაფერია.
გასაკვირი არ იქნება თუ ვიტყვით, რომ ნიკის საქართველო განსაკუთრებულად უყვარს , რადგან მას ქართველი მეუღლე და უსაყვარლესი შვილი , ლენი კანდელაკი ჰყავს, რომელიც კონცერტის დასაწყისში დედამ ფართო აუდიტორიას წარუდგინა, ნიკიმ კულისებში აღნიშნა, რომ ის „ნახევრად ქართველია“ , რადგან ქართველი ოჯახი ჰყავს.
კონცერტის დასაწყისშივე მუსიკოსმა საოცარი ცეცხლი დაანთო სცენაზე და ფანქის რითმებზე ყველამ და ყველაფერმა ერთდროულად დაიწყო ცეკვა .
უნდა აღინიშნოს ნიკის განსაკუთრებული დამოკიდებულება პუბლიკასთან, კონცერტის დაწყებიდან რამდენიმე სიმღერის შემდეგ მუსიკოსი სცენიდან ჩამოვიდა, გაარღვია ყველანაირი საზღვრები ( მას ეს სჩვევია , რაც იგრძნობა კიდეც მუსიკოსის შემოქმედებაში) და მსმენელები სცენის სიახლოვეს იხმო, ზუსტად მაშინ დაიწყო ნამდვილი კონცერტი. თავის არაჩვეულებრივ ბენდთან ერთად ნიკი ბოლომდე დაიხარჯა და ფანქის ნამდვილი დღესასწაულის მომსწრენი გავხდით.
კონცერტის ბოლოს ნიკიმ დარბაზიდან აიყვანა მარიამ კუბანსკი , რომელთან ერთადაც ბენდმა ტინა ტერნერის ცნობილი სიმღერის ქავერი , Proud Mary შეასრულა. ასე დასრულდა ეს კონცერტი და იმედია ნიკი ცოტა ხნით დაგვემშვიდობა.
ნიკ უესტი ითვლება თანამედროვეობის საკულტო ბასისტად, რომელმაც საერთაშორისო პრესა აალაპარაკა , ფრანგულმა “Rolling Stone” – მა მას „ ბასისტების დედოფალი“ უწოდა.
მოამზადა ქეთი კობიძემ
